Կորյունը 5 տարեկան է։ Նա շատ է սիրում գրքեր կարդալ (ավելի ճիշտ մայրիկն է կարդում նրա համար), «Պապն ու շաղգամը» սիրելի հեքիաթներից է:

Կորյունը իր 3 տարեկան քույրիկի հետ սիրում է մեքենաներով խաղալ: Նա երազում է մոտոցիկլետ ունենալու մասին։
Նրա սիրած հերոսը Սարդ մարդն է՝ ուժեղ, խիզախ ու միշտ պայքարող։ 
Եվ հենց այդպիսին է մեր Կորյունը՝ փոքրիկ, բայց մեծ ուժ ունեցող տղան։

Այս պահին Կորյունը բուժում է ստանում մանկական քաղցկեղի և արյան հիվանդությունների կենտրոնում։ Նա իր բոլոր սիրելիների, բժիշկների ու մեր բոլորի աջակցության շնորհիվ ամեն օր փոքրիկ քայլերով հաղթում է հիվանդությանը։

13 տարեկան անուշիկ Անուշիկը՝ մեր այս Չորեքշաբթի օրվա հերոսն է:

Մեր քչախոս գեղեցկուհին երազում է աստղադիտակի մասին:

Նրա գեղեցիկ ժպիտի հետևում երկար ու բարդ բուժման ճանապարհ է:

Անուշիկը սիրում է հեքիաթներ կարդալ՝ «Մոխրոտիկն» ու «Քնած գեղեցկուհին» սիրելի հեքիաթներից են:

Երբ տանն է լինում, սիրում է նկարել տատիկի հետ: Անուշիկը տարված է բնությունով ու նրա հրաշքներով:

Աստղադիտակ ունենալու երազանքը, բնության հրաշքներից մեկի, աստղազարդ երկինքն ուսումնասիրելու ու ավելի շատ երազելու մասին է:

Անուշիկը փոքր քույրիկ ունի: Ճիշտ է տխրում է, երբ հեռու են լինում իրարից, բայց համոզված է, որ ապաքինվելու և քույրիկի հետ նայելու են տիեզերքին:

Ծանոթացեք մեր 4 տարեկան Գագիկի հետ Նա այս Չորեքշաբթի օրվա հերոսն է:

Գագիկը Արարատի մարզից է և երազում է մեծ մոտոցիկլետ ունենալու մասին:

Երբ Գագիկին հարցրեցինք, թե ինչի մասին է նա երազում, առանց մեկ վայրկյան մտածելու, պատասխանեց, որ երազում է շուտ ապաքինվելու և տուն վերադառնալու մասին:

Գագիկը շատ է սիրում խաղալ մեքենաներով:

Երբ բժիշկների թույլտվությամբ կարողանում է գնալ տուն եղբոր հետ հեծանիվ են քշում ու գնդակ խաղում:

Դավիթը՝ մեքենաների սիրահարը, ով մարտահրավեր Է նետում քաղցկեղին, մեր այս Չորեքշաբթի օրվա հերոսն է:

Դավիթը ընդամենը 1.8 տարեկան է՝ մի փոքրիկ, բայց ուժեղ ու ժպտերես մարդուկ։

Նրա աչքերը փայլում են ամեն անգամ, երբ որևէ մեքենա է տեսնում՝ լինի խաղալիք, թե իսկական։

Բայց Դավիթի մանկությունն այնքան պարզ ու խաղով լի չէ, որքան կցանկանայինք մենք բոլորս: Նա այս պահին անցնում է կյանքի ամենածանր ճանապարհներից մեկը՝ քաղցկեղի դեմ պայքարի ուղին։ Բժշկական սարքեր, հիվանդանոցային պատեր, երկար բուժումներ…

Սակայն Դավիթը չի հանձնվում։ Նա պայքարում է՝ իր աչքերում միշտ ունենալով այն երազանքը, որ երբ մեծանա, կունենա մեծ, իսկական մեքենա։

Դավիթի մայրիկի հետ զրույցի արդյունքում պարզեցինք, որ Դավիթը ուզում ունենալ մեծ մեքենա, որով մայրիկի կամ հայրիկի ուղեկցությամբ կկարողանան շրջել հիվանդանոցի բակում բուժում ստանալու ընթացքում, իսկ հետո նաև Հրազդանի իրենց տան բակում: