Այս չորեքշաբթի ձեզ ուզում ենք ծանոթացնել Նաիրիի հետ և կիսվել նրա երազանքով:

Նա 11 տարեկան է՝ Բագրատաշենից: Նաիրին երազում է էլեկտրական ինքնագլոր ունենալու մասին՝ ընկերների հետ միասին քշելու համար

Նաիրին սիրում է նկարել, կարդալ և սեղանի խաղեր խաղալ: Հայաստանի մանկական քաղցկեղի և արյան հիվանդությունների կենտրոնում շատ ընկերներ ունի: Դեղորայքը ստանալուն պես Թամարայի հետ, ում արդեն ծանոթ եք մեր նախորդ հրապարակումներից մեկից, շտապում են խաղասենյակ՝ լիիիքը խաղեր խաղալու:

Նաիրիի եղբայրներից մեկը ծառայում է հայոց բանակում: Մյուս եղբոր հետ սիրում են հեծանիվ քշել, երբ վերադառնում է տուն:

Չորեքշաբթին մեր փոքրիկ հերոսների մասին է:

Աննան է 5 տարեկան: Նա Գեղարքունիքի մարզի Մարտունի քաղաքից է:

Մեր պստիկ կարմրաթուշիկը երազում է կարմիր գույնի մեքենա ունենալու մասին (շատ հստակ պատկերացնում է իրեն 5 տարեկանում մեքենա վարելիս)

Հայաստանի մանկական քաղցկեղի և արյան հիվանդությունների կենտրոնի խաղասենյակում շատ է սիրում լեգոներով ճաշ պատրաստել Սիրում է նաև ջրաներկերով նկարել. տնակ է նկարում 3 խոզուկներից մեկի համար:

13 տարեկան անուշիկ Անուշիկը՝ մեր այս Չորեքշաբթի օրվա հերոսն է:

Մեր քչախոս գեղեցկուհին երազում է աստղադիտակի մասին:

Նրա գեղեցիկ ժպիտի հետևում երկար ու բարդ բուժման ճանապարհ է:

Անուշիկը սիրում է հեքիաթներ կարդալ՝ «Մոխրոտիկն» ու «Քնած գեղեցկուհին» սիրելի հեքիաթներից են:

Երբ տանն է լինում, սիրում է նկարել տատիկի հետ: Անուշիկը տարված է բնությունով ու նրա հրաշքներով:

Աստղադիտակ ունենալու երազանքը, բնության հրաշքներից մեկի, աստղազարդ երկինքն ուսումնասիրելու ու ավելի շատ երազելու մասին է:

Անուշիկը փոքր քույրիկ ունի: Ճիշտ է տխրում է, երբ հեռու են լինում իրարից, բայց համոզված է, որ ապաքինվելու և քույրիկի հետ նայելու են տիեզերքին:

Այս չորեքշաբթի ձեզ ուզում ենք ծանոթացնել Թամարայի հետ:

Նա 11 տարեկան է, Սևանից: Թամարան երազում է ունենալ անիվներով մարզակոշիկներ, որ, երբ հոգնի դպրոցից տուն ճանապարհին քայլելուց կարողանա սահել անիվների վրա:

Թամարան ամեն առավոտ պարտադիր ժամանակ է հատկացնում կարդալուն՝ ընթերցում է «Նոր կտակարանը». ասաց արդեն հասցրել է «Մանկական աստվածաշունչն» ու «Հին կտակարանը» կարդալ:

Հայաստանի մանկական քաղցկեղի և արյան հիվանդությունների կենտրոնում բուժում ստանալու ընթացքում Թամարան ընկերոջ՝ Նաիրիի հետ՝ խաղասենյակում, թիմային խաղերով է սիրում զբաղվել:

«Սևանում, ճիշտ է, շատ չկան ժամանցի վայրեր՝ առևտրի կենտրոններ, խաղահրապարակներ, ինչքան Երևանում, բայց կա մի բան, որ միայն Սևանում է՝ Գեղամա գեղեցկուհին՝ Սևանա լիճը». ասում է Թամարան: