Ծանոթացեք մեր 4 տարեկան Գագիկի հետ Նա այս Չորեքշաբթի օրվա հերոսն է:

Գագիկը Արարատի մարզից է և երազում է մեծ մոտոցիկլետ ունենալու մասին:

Երբ Գագիկին հարցրեցինք, թե ինչի մասին է նա երազում, առանց մեկ վայրկյան մտածելու, պատասխանեց, որ երազում է շուտ ապաքինվելու և տուն վերադառնալու մասին:

Գագիկը շատ է սիրում խաղալ մեքենաներով:

Երբ բժիշկների թույլտվությամբ կարողանում է գնալ տուն եղբոր հետ հեծանիվ են քշում ու գնդակ խաղում:

Դավիթը՝ մեքենաների սիրահարը, ով մարտահրավեր Է նետում քաղցկեղին, մեր այս Չորեքշաբթի օրվա հերոսն է:

Դավիթը ընդամենը 1.8 տարեկան է՝ մի փոքրիկ, բայց ուժեղ ու ժպտերես մարդուկ։

Նրա աչքերը փայլում են ամեն անգամ, երբ որևէ մեքենա է տեսնում՝ լինի խաղալիք, թե իսկական։

Բայց Դավիթի մանկությունն այնքան պարզ ու խաղով լի չէ, որքան կցանկանայինք մենք բոլորս: Նա այս պահին անցնում է կյանքի ամենածանր ճանապարհներից մեկը՝ քաղցկեղի դեմ պայքարի ուղին։ Բժշկական սարքեր, հիվանդանոցային պատեր, երկար բուժումներ…

Սակայն Դավիթը չի հանձնվում։ Նա պայքարում է՝ իր աչքերում միշտ ունենալով այն երազանքը, որ երբ մեծանա, կունենա մեծ, իսկական մեքենա։

Դավիթի մայրիկի հետ զրույցի արդյունքում պարզեցինք, որ Դավիթը ուզում ունենալ մեծ մեքենա, որով մայրիկի կամ հայրիկի ուղեկցությամբ կկարողանան շրջել հիվանդանոցի բակում բուժում ստանալու ընթացքում, իսկ հետո նաև Հրազդանի իրենց տան բակում:

Այսօր Չորեքշաբթի է, իսկ դա նշանակում է, որ ձեզ ծանոթացնելու ենք մի նոր սուպերհերոսի հետ:

Հայկն է՝ 2 տարեկան:

Հայկի մայրիկը մեզ պատմեց, որ նա շատ է սիրում հիվանդանոցը: Ձեր կատարած նվիրաբերությունների շնորհիվ Հայկը և Սիթի օֆ Սմայլի շատ շահառու փոքրիկներ իրենց դեղորայքները ստանում են պորտ (port a cath) համակարգի միջոցով ինչը թույլ է տալիս խուսափել բազմաթիվ ծակոցներից որի շնորհիվ էլ Հայկը հիվանդանոցում իրեն լավ է զգում:

Հայկը կարիք ունի զբոսանքի մանկասայլակ ունենալու, քանի որ դեռ շատ փոքրիկ է, բայց անցնում է կյանքի դժվար փուլ, նրան տեղաշարժվելու համար մանկասայլակը պարզապես անհրաժեշտություն է: Հայկը սիրում է շփվել Ռոբինի հետ:

Ռոբինը նրան հանդիպելիս միշտ ասում է, որ Հայկը շատ անուշիկ ու թմբլիկ թուշիկներ ունի: Հայկը ունի 5 տարեկան քույր, ով անչափ հոգատար է: Երբ տուն են վերադառնում նա մեծի պես հոգ է տանում Հայկի մասին:

Այս չորեքշաբթի ձեզ ուզում ենք ծանոթացնել Նաիրիի հետ և կիսվել նրա երազանքով:

Նա 11 տարեկան է՝ Բագրատաշենից: Նաիրին երազում է էլեկտրական ինքնագլոր ունենալու մասին՝ ընկերների հետ միասին քշելու համար

Նաիրին սիրում է նկարել, կարդալ և սեղանի խաղեր խաղալ: Հայաստանի մանկական քաղցկեղի և արյան հիվանդությունների կենտրոնում շատ ընկերներ ունի: Դեղորայքը ստանալուն պես Թամարայի հետ, ում արդեն ծանոթ եք մեր նախորդ հրապարակումներից մեկից, շտապում են խաղասենյակ՝ լիիիքը խաղեր խաղալու:

Նաիրիի եղբայրներից մեկը ծառայում է հայոց բանակում: Մյուս եղբոր հետ սիրում են հեծանիվ քշել, երբ վերադառնում է տուն: