Չորեքշաբթի է, և այսօրվա հերոսը 13-ամյա Հովհաննեսն է Շիրակի մարզից։ Հովհաննեսի տարերքը տիեզերքն է։ Չկա մի օր, որ նա չկարդա տիեզերքի մասին լուրերն անգամ Հայաստանի մանկական քաղցկեղի և արյան հիվանդությունների կենտրոնում բուժում ստանալու շրջանում։
Մայրիկն ամեն անգամ հիանում է Հովհաննեսի գիտելիքներով։ Օրինակ՝ հիվանդասենյակի իր պատուհանից նայելով թռչունների թռիչքին՝ Հովհաննեսը մայրիկին ասել էր, որ մագնիսական դաշտը թուլացել է, քանի որ այն կողմնորոշիչ է հանդիսանում թռչունների համար, որոնք այդ պահին անկանոն էին թռչում։
Ընկերասեր Հովհաննեսը չի համբերում, թե երբ է միավորվելու ֆուտբոլի իր թիմի հետ, որոնց հետ մարզվում էր մինչև հիվանդության հայտնաբերումը։
Բազմակողմանի զարգացած մեր տղան նաև երաժշտասեր է և շատ է ցանկանում մի օր կիթառ նվագել սովորել։
Հովհաննեսի ցանկությունն է ունենալ մի լավ աստղադիտակ, որով կնայի աստղերին Գյումրիի իրենց տան պատուհանից։
Հովհաննեսի երազանքը կատարվեց շնորհիվ փոքրիկ Արեգի, ով տեսնելով Հովհաննեսի երազանքի մասին պատմող լուսանկարները՝ որոշեց իր ծննդյան նվերով ուրախացնել մեր հերոսին:
Հովհաննեսն այնքան ոգևորված է իր աստղադիտակով որ խնդրել է Հայաստանի մանկական քաղցկեղի և արյան հիվանդությունների կենտրոնի իր բժշկին թույլ տալ գիշերել տանը, որպեսզի երեկոյան կարողանա իր պատուհանից ուսումնասիրել աստղերն ու մոլորակները:
